Ko wai mātou?
He kōhanga reo tēnei i Heretaunga, e ngākau titikaha nei ki whakatipu tamariki kōrero Māori.
Ko te whakapono o tēnei kōhanga, ko te reo me ngā tikanga, ko te hononga ki te taiao, me ngā mātauranga ā-iwi, o te ao Māori anō hoki, te one haumako e puāwai ai te pito mata o te tamaiti.
-
We are a kōhanga reo bawsed in Hastings that is committed to supporting whānau raising tamariki with te reo Māori as their primary langauge.
We believe that nurturing tamariki with te reo and tikanga Māori, a strong connection to the taiao, and mātauranga ā-iwi, provides a strong foundation for them to reach their full potential.
OHU WHAKAHAERE
TE URANGA WINIATA
HEAMANA
Ōna iwi: Ngāti Tūwharetoa, Ngāti Rereahu, Taranaki, Te Waiohua, Ngāti Te Ata, Ngāti Whātua, Ngāti Hine, Te Rarawa
Ngā tohu:
Bachelor of Laws and Arts Conjoint – University of Auckland
Masters of Laws (Honours) Public Law – University of Auckland
Ika a Whiro – Te Panekiretanga o Te Reo
Director of Kawea Law & Consultancy
-
E rua ā rāua ko Piripi tamariki, arā, ko Awatea JJ Te Pīata Winiata (6) rāua ko Te Āroi Tai Aroha Winiata (4). He nui atu hoki ā rāua whāngai e noho ana ki Te Whanganui-a-Tara, ki Tāmaki, ki hea, ki hea. Nō Ngāti Kahungunu ki Te Wairoa, nō Rongomaiwahine, nō Rongo Whakaata te ure tārewa.
Kua toru tau te whānau nei e noho ana ki Heretaunga, he hiahia nō Te Uranga me Piripi ki te whakatipu i ngā tamariki ki roto i te mātotorutanga o tētahi o ō rāua iwi. Nā, kua roa a Kahungunu e manaaki ana i te whānau nei, otirā, i te reo o ngā mātua, ā, ka whakatau rāua kia hoki pēnei mai ki te whakahoki i te nui o te whakaaro.
Ko tā Te Uranga 9-5pm, ko te mahi rōia, heoi, ko tana 24/7 ko te whakaū i te Te Tiriti o Waitangi, te whakarauora reo, te whakarauora tikanga, te whai hoki i te mana motuhake. Kua noho ia hei kaihautū ki Te Kōhanga Reo o Ngā Mokopuna (Te Whanganui-a-Tara), kua whakaako hoki i ngā kaimahi o Te Tari Matua o Te Kōhanga Reo i roto i ngā tau, he whakapono nōna ki te kaupapa.
TAKARANGI BRADSHAW
KAITIAKI PŪTEA
Tōna iwi: Ngāti Kahungunu ki Te Wairoa
Tōna hapū: Ngāti Hinehika
Tōna marae: Te Reinga
Ngā tohu:
Bachelor of Commerce – Victoria University
Te Aupikitanga ki Te Reo Kairangi – Te Wānanga o Aotearoa
Chartered Accountant
Director of Shepherd Hensman Ltd
-
He katiaki pūtea a Takarangi. Tokowhā āna tamariki, kotahi e haere ana ki te kōhanga i te wā nei, ko Te Kōtuku. Kua toru tau a Takarangi e noho ana ki te ohu whakahaere a Te Puāwaitanga o Te Pito Mata hei kaitiaki pūtea. Ko tōna tino whāinga, ki te kite i te tipu haere o te oranga o ngā tangata Māori, o te oranga a tā tātau reo matahīapo hoki.
Kaimahi
ROWENA TUIRA
KAIWHAKAHAERE
Ōna maunga: Tawhirirangi, Whanganui-a-Tara, Kahuranaki
Tōna iwi: Ngāti Kahungunu
Ōna hapū: Ngāti Pāhauwera, Ngāti Kurukuru, Ngāti Pōporo
Ōna marae: Mohaka, Waimārama, Korongata
Ōna awa: Mohaka, Waingongoro, Ngaruroro
Ngā tohu:
First Aid Certificate
Te Tohu Whakapakari Tino Rangatiratanga - Te Kōhanga Reo National Trust Board
Te Takaimatua - Te Kōhanga Reo National Trust Board
Level 4 Certificate in Early Childhood – Manukau Institute of Technology
-
He manu pīrere nō te kōhanga reo, ā nō tōna taiohitanga kua mahi ia ki roto i ngā kura tuatahi hei Kaiako mō te reo me ōna tikanga. I tīmata ia ki Kahu O Te Rangi Te Kōhanga Reo i te tau 1994. Nō reira mai anō tōna mōhio ki tēnei kaupapa. Tokorima āna tamariki. I tuku atu i tana mātāmua a Teejay ki reira i te tau 2015. Nō reira mai anō aia whai tūranga mahi hei kaiāwhina. Ka tīmata ia i Te Tohu Whakapakari Tino Rangatiratanga o Te Kōhanga Reo i raro i ngā parirau o Grace Hawkins. I te tau 2018 i whakawhiti mai ia hai Kaiako ki Te Kōhanga Reo o Mere Kārena ka tahi. Mai i te tūwheratanga mai o Te Puāwaitanga o Te Pito Mata i te tau 2019, kua noho mai ia hei kaiwhakahaere, hei kaiako anō hoki. Nā tōna aroha ki ngā tamariki me te reo e manawa popore ana ia ki te whāngai i te reo me ōna tikanga ki ngā tamariki, kia mōhio ai rātou ngā tamariki nō hea, ko wai rātou, ā kia toitū ko ngā mokopuna, kia toitū te reo Māori, kia toitū te mana motuhake!
GRACE HAWKINS
KAIAKO MATUA
Tōna maunga: Kahu-rā-anake
Tōna waiū: Poukawa
Tōna waka: Takitimu
Tōna marae: Te Hauke
Tōna hapū: Ngai Te Rangikoianake
Tōna iwi: Ngāti Kahungunu
Ngā tohu:
First aid certificate
Te Tohu Whakapakari Tino Rangatiratanga – Te Kōhanga Reo National Trust Board
Te Pīnakitanga ki Te Reo Kairangi – Te Wānanga o Aotearoa
-
Kua neke atu i te 30 tau ia e noho ana ki te kaupapa o te kōhanga reo. Kua waimarie ia ki te noho ki ngā rekereke o ētahi o ngā kaumātua o te rohe nei nā rātou anō te kaupapa i rewa ki roto o Kahungunu nei. Tokoono āna tamariki, ā he maha āna mokopuna. He wāhine pūmau ki te reo Māori, ahakoa ki hea. He pou whirinaki ia mā te whānau, mā ngā kaimahi otirā mā ngā mokopuna. E mārama pū ana ia ki Te Whāriki a Te Kōhanga Reo. Ko ia tērā ka whakatinana i ngā pou e whā o Te Kōhanga Reo ao noa, pō noa. He toki ia o te kaupapa, ā e whai ana ia i Te Tohu Paerunga Korowai Mokopuna i tēnei wā tonu – he tohu e hāngai ana ki te poipoi mokopuna matea ako, hauā anō hoki.
LARISSA WALKER
KAIĀWHINA
Tōna maunga: Puketapu
Tōna awa: Ngaruroro
Tōna waka: Takitimu
Tōna marae: Omahu
Tōna hapū: Ngai Te Ūpokoiri, Ngāti Hinemanu
Tōna iwi: Ngāti Kahungunu
Ngā tohu:
First Aid certificate
Te Ara Tuarua – Te Kōhanga Reo National Trust Board
-
He manu pīrere nō te kōhanga reo, kua tau nei ki Te Puāwaitanga o Te Pito Mata hai kaimahi me āna tamariki tokotoru. Tokorua o rātou kua rere atu ki te kura kaupapa Māori, kei te kōhanga reo tonu te pōtiki. Kua waimarie ia ki te noho ki raro i ngā manaakitanga a Grace Hawkins me te whai māramatanga ki te kaupapa me ōna here ki Te Whāriki a Te Kōhanga Reo me Te Korowai.
He wahine hūmarie, he wahine ū ki te whakaaro pono, he wahine aroha nui ki te mokopuna. He pukenga ōna ki te tuitui i te ao hangarau ki roto i āna mahi. Ahakoa e noho ana hei kaiāwhina i tēnei wā tonu, e mārama pai ana ia ki te tūranga o te kaiako me ngā haepapa maha. He hiahia nōna ki te whai i Te Tohu Paetahi o Te Whakapakari Tino Rangatiratanga ā tērā tau.
KARAMAENA MORRELL
KAIĀWHINA
Tōna maunga: Kahu-rā-anake
Tōna awa: Kārewarewa
Tōna waiū: Poukawa
Tōna waka: Takitimu
Ōna marae: Te Hauke, Mangaroa
Ōna hapū: Ngai Te Rangikoianake, Ngāti Rāhunga-i-te-Rangi
Tōna iwi: Ngāti Kahungunu
Ngā tohu:
NCEA Level 3 Te Reo Rangatira – NZQA
-
He manu pīrere nō te kōhanga reo, he raukura hoki nō te kura kaupapa Māori, he māmā ki tāna iti, kia Mangahanea. Nā Mangahanea te ahi i kā ki roto i te whatumanawa o tōna māmā kia whakatipu mai i a ia ki roto i te mātotorutanga o te ao Māori, kia mātāmua ko te reo me ōna tikanga. Nā konā ka tau mai ki Te Puāwaitanga o Te Pito hei kairīwhi. Heoi anō ināianei e noho mai ana hei kaiāwhina. He pūkenga ōna ki te whakakoakoa i ngā mokopuna me te mahinga kai.
KRISTYN BRADSHAW
KAIĀWHINA
Tōna maunga: Tapuae o Uenuku
Tōna awa: Waiau Toa
Tōna waka: Takitimu
Tōna maunga: Takahanga
Tōna hapu: Ngāti Kurī
Tōna iwi: Ngai Tahu
Ngā tohu:
First aid certificate
Heke Reo Māori Level 5 – Te Wānanga o Raukawa
Bachelor of Teaching and Learning (Primary) – University of Caterbury
-
He wahine māia kua tau ki Ngāti Kahungunu nei me tana hoa rangatira a Haimona rātou ko ā rāua tamāhine a Anahera rāua ko Māia. I mua i te whānautanga mai o āna tamariki, kua noho ia hei Kaiako Kura Tuatahi ki te rohe o Te Papaioea, ki tāwāhi anō hoki. Nō muri mai, kua huri te kei ki te ao Māori, ā kua noho ia ki te whai i te reo Māori. He hiahia nōna ki te whai tūranga mahi kaupapa Māori. Nō reira mai ia whai tūranga hei kaiāwhina ki Te Puāwaitanga o Te Pito. Kei te whai ia i Te Ara Tuarua e pakari ake ai tana māramatanga ki te kaupapa o Te Kōhanga Reo me ōna here maha.